راعي ابو مَرْوِه هذا - الله يسلّمك - من الخليفة (عائلة معروفة بالرس) وهو فَلاّح ومِكانه (فلاحته) يقال له ابو مروه· تزوج ولكن انتصف عمره ما اراد الله له ذِرّيه· واخذ مرة ثانيه يحسب ان الخمال من المرة الاوّله واثره ما اراد الله له ذريه· وخْمِطُه الشيب وهو ما جاوه عيال· ويريد الله ويَحَمْلِن حريمه الثنتين جميع - الله واكبر- ويجيبن وْلِدين· يوم ان العيَيّل (تصغير عيال/أولاد) فَرْهَدوا (كبروا) الوم انه انفتن بهم، واموره بعد كانت زينة وضاحكةٍ له الدنيا - مْكَيّنه (تصغير مكان/فلاحة) كني (كأني) والله اشوفه هالحين بين قصر ابن عقيّل والشنانه، مكان يفتح العين الرمدا، خِضْره ونخل والما عنده راهي وحلو· المراد العيَيّل يوم صار لهم خمس سنين، يعني فرهدوا وصاروا حليلين، واصبح هكاليله وجا يْدَوّرهم، يبيهم، ويلقاهم جامدين بِفْرَيّشاتهم· ويوم قلبهم والى هم ميتين جميع بلا شكوى ولا مرض ولا شَي· نايمينٍ ما بهم خلاف واصبحوا ميّتين - انا لله وانا اليه راجعون· الوم انه اختل عقله ابن الحلال على عياله الله يْدافِع· عاد ما طَوّلت له عقبهم· لَحْقِهم، ذْبِحه الحزن الله يعفي عنا وعنه ويكافينا وايّاكم شر الصدوف· بس قبل ما يموت قال هالكليمات، يقول:

ثواب هو اصغر عْيَيّله· رحمة الله عليه· الله لا يفجعنا واياكم لا بحبيب ولا بقريب·